Чаму не косяць могілкі ў Гродне? Актывіст спытаўся і вось што адказала САГ

Гродзенскі актывіст Анатоль Мышкевіч занепакоіўся станам могілак Аульс. Ён туды прыязджае на магілы родных і кажа, што ўвесь летні сезон там велізарныя зараслі, якія не косяць. Анатоль адправіў запыт у Спецаўтагаспадарку, каб яны адказалі, як часта і хто павінен касіць.

— Справа ў тым, што некаторыя людзі прыбіраюць, прыязджаюць на магілы — я сам вельмі часта бываю на могілках. Але шмат пахаванняў - ці сваякі ў іншых гарадах жывуць, ці блізкіх людзей няма. І вось я ў бабулі з дзядулем прыбіраю, і трэба яшчэ магілак пяць-шэсць скасіць вакол. Таму што зараслі велізарныя. І такіх участкаў вельмі шмат на могілках, — распавядае Анатоль.

Ён кажа, што сам можа прыбраць магілы. А што рабіць пажылым людзям? У спякоту касіць і так складана, а трэба яшчэ прайсці каля 50 метраў, каб выкінуць скошаную траву. Праўда, на Аульсе ёсць платная паслуга — за пакос травы трэба аддаць 20 рублёў.

Анатоль кажа, што гэтая праблема ўзнікае больш на старой частцы могілак. На новых сектарах іншы грунт, і трава расце менш.

Могілкі косяць, але не ўсюды

Актывіст адправіў запыт у САГ, каб яму адказалі, ці косяць там траву, колькі на 2019 год было запланавана пакосаў, колькі іх ужо было і хто заказчык работ. «У гэтым годзе адназначна ніхто не касіў. І кожны год такая ж сітуацыя», — кажа Анатоль.

У САГу адказалі, што менавіта яны ажыццяўляюць пакос на ўсіх могілках, у тым ліку і на Аульсе. Але косяць яны толькі ў месцах агульнага карыстання. Гэта прылеглая тэрыторыя, тэрыторыя каля кантэйнерных пляцовак, па перыметры могілак, на ўнутраных газонах і па перыметры сектараў. Пакос адбываецца не часцей за адзін раз у месяц, у гэтым годзе яны ўжо касілі.

За магіламі трэба сачыць самім

Таксама ў САГ звяртаюць увагу, што згодна з пастановай Міністэрства ЖКГ, людзі, якія ўзялі на сябе арганізацыю пахавання і ўстаноўкі надмагільных пліт, павінны самі сачыць за станам магілы і тэрыторыі вакол яе.

hrodna.life/articles/mogilki-ci-krematoryiy/