Гіганцкая «Джэнга» і турнір па «Каркасону». У гродзенскім дворыку адзначаць Міжнародны дзень настольных гульняў

У Гродне запрашаюць адзначыць Міжнародны дзень настольных гульняў. Арганізатары — гродзенская крама-клуб настольных гульняў «Кубік», вядомая стварэннем гульні «Паўстанцы», сучасным перавыданнем старых гродзенскіх ігральных карт з фабрыкі Лапіных і распрацоўкай многіх іншых настольных гульняў.

У дворыку па вул. Кірава, 3 у нядзелю, 2 чэрвеня, арганізатары будуць ладзіць гульнятэкі і турніры для дзяцей ад 3 гадоў і для дарослых. Там жа можна будзе пагуляць у гіганцкія настолкі. Свята пачнецца ў 12.00 і скончыцца ў 20.00, уваход бясплатны.

Праграма:

• Вялікая гульнятэка. Больш за 400 настольных гульняў.
• Камандны турнір па настольнай гульні «Кодавыя імёны» (пачатак каля 13.00).
• Турнір па настольнай гульні «Каркасон» (пачатак каля 16.00).
• Гіганцкія настольныя гульні: «Каркасон», «Джэнга», «Дойліды».
• Акцыя «Кубік поспеху»: усе ўдзельнікі могуць атрымаць да 5 манет, якія можна абмяняць на настольныя гульні.
• Усе ўдзельнікі атрымаюць у падарунак міні-настольную гульню «Паляванне за літарамі».
• Знаёмства з гульнямі-навінкамі.

Як расказалі арганізатары, першы Сусветны дзень настольных гульняў (International Tabletop Day) заснаваў у 2013 годзе Уіл Уітан, вядучы вэб-шоў TableTop (многім ён знаёмы па ўдзелу ў «Тэорыі Вялікага Выбуху»). З тых часоў гэтую ініцыятыву з году ў год падтрымліваюць выдаўцы і гульцы з розных куткоў Зямлі, збіраючыся разам у адзін і той жа дзень і гуляючы ў настольныя гульні.