Гродзенцаў заклікаюць заступіцца за драўляныя дамы у Новым Свеце. Гарадскія ўлады маюць намер прадаць зямлю на вуліцы Міцкевіча пад будоўлю аб’екта грамадскага прызначэння. Калі знойдзецца інвестар, пад знос пойдуць дзве ўнікальныя пабудовы старога раёна. Гісторык Мечыслаў Супрон 3 мая звярнуўся да гродзенцаў з прапановай напісаць лісты ў гарадскую адміністрацыю.
Мечыслаў Супрон разам з журналістам Hrodna.life 10 красавіка былі на прыёме ў старшыні гарвыканкама Мечыслава Гоя, адзначыў - чыноўнікі не бачаць у драўляных дамах Новага Свету ніякай гістарычнай і мастацкай каштоўнасці.
«Нешта пайшло не так, і замест таго, каб даць шанец захаваць унікальныя драўляныя дамы з брандмаўэрамі па адрасе вул. Міцкевіча, 7 і 9 (сярод іх так званы «дом з драконамі») і прадаць на аўкцыёне пад жыллё (а я ведаю, што знойдуцца такія людзі, якія захочуць тут жыць), гродзенскія ўлады вырашылі прадаць іх пад знос і будаўніцтва камерцыйнага будынка. Гэтага нельга дапусціць! Якія будуць прапановы? Пісаць уладам!
Справа ў тым, што чыноўнікі з гродзенскага гарвыканкама не бачаць у гэтых будынках ніякай гістарычнай і мастацкай каштоўнасці. Мы павінны даказаць, што гэта не так. У пагоні за кароткатэрміновымі выгадамі, улады не ўлічваюць, што мы губляем значна больш:
— губляем турыстычную прывабнасць цэлага квартала;
— губляем твар горада, гісторыю і сваю асаблівасць, якую змаглі б «прадаваць» іншым;
— губляем самыя актуальныя і ЦІКАВЫЯ драўляныя дамы Новага Свету;
— губляем нашу спадчыну, якую б маглі пакінуць нашым нашчадкам.
«Улады лічаць, што каштоўнасць у гэтых будынках бачаць толькі гісторыкі. Але гэта не так! І мы павінны даказаць гэта! Не лянуйцеся і напішыце ліст у гарвыканкам. Вось эл. адрас: [email protected] «, — дадаў гісторык.
Старшыня гарвыканкама падчас прыёму паабяцаў даць старым пабудовам яшчэ адзін шанец і выставіць на аўкцыён у пошуках новага ўладальніка. Але выйшла наадварот — самыя каштоўныя драўляныя пабудовы ў Новым Свеце рыхтуюць да зносу для будучага будаўніцтва гандлёвага цэнтра ці гасцініцы.
Па ўмовах аўкцыёна, каторы прызначаны на 28 мая, забудоўшчык зможа пабудаваць будынак грамадскага прызначэння. Ён будзе 2−3-павярховы, магчыма з мансардным паверхам, з памяшканнямі адміністрацыйнага, гандлёвага, бытавога прызначэння, гасцінічнымі нумарамі. Плошча ўчастка 20 сотак. Пад знос ідуць не толькі дома № 7 і № 9, але і № 5, і № 7а. У апошнім яшчэ жыве сям’я.
Таргі пачнуцца з 24,3 тысяч рублёў. Адзначым, што ўладальніка яшчэ на этапе зносу чакаюць сур’ёзныя фінансавыя выдаткі. Згодна з падлікамі спецыялістаў гарвыканкама, арыентыровачны памер страт на дэмантаж старых дамоў - каля 467 тысяч рублёў.
Даведка
Вуліца Міцкевіча ўтварылася ў другой палове XIX стагоддзя. На плане горада 1882 года яна ўжо пазначаная, але яшчэ не мае назвы, а вось на карце 1900 года вуліца называецца Сувораўская. Да пачатку Першай сусветнай вайны яна насіла імя рускага палкаводца. З другой паловы 1920-х гадоў называлася вуліцай Міцкевіча. З прыходам савецкай улады ў Гродне за вуліцай захавалася імя Міцкевіча, зацверджанае рашэннем гарвыканкама ад 15 студзеня 1940 года.
Вуліца уваходзіць у раён Новы Свет. Сёння ад калісьці унікальнага раёна захавалася ўсяго некалькі каштоўных пабудоў. Сярод іх дамы № 7 і 9, якія былі пабудаваныя ў стылі рускага мадэрна. У іх ужо 5 гадоў ніхто не жыве. Дамы былі пабудаваныя ў пачатку XX стагоддзя і з’яўляюцца ўзорам драўлянай архітэктуры.
