Могілкі «Аульс» пад Гродна пашыраюць. Ёсць два напрамкі

Пра гэта паведаміў Мечыслаў Гой. Плошча некропаля складае 40 гектараў. Год таму да іх дадалі новых 6,6 гектары. Сёння тут распрацоўваюць сектары. Па словах старэйшага майстра ўчастка грамадзянскага абслугоўвання ГГУПП «Спецаўтагаспадаркі» Віктара Чумічава, разглядаюць яшчэ два ўчасткі: поле, размешчанае ў напрамку станцыі Аульс, і ўчастак у бок «Азоту», піша «Перспектыва».

Нагадаем, што паўгода таму жыхары Путрышак выказвалі незадаволенасць, што могілкі падаўжаюць да аграгарадка, высякаючы дрэвы. Тады ў сітуацыю прыйшлося ўмяшацца Уладзіміру Краўцову.

— Гэтае пытанне цалкам закрыта. Землі ў кірунку Путрышак адводзіцца не будуць. Гэта патрабаванне санітарных нормаў: могілкі павінны знаходзіцца на адлегласці не бліжэй за 300 метраў ад населенага пункта. Пры гэтым патрэбныя зялёныя насаджэнні, — растлумачыў Віктар Чумічаў.

Сёння «Аульс» — самыя буйныя могілкі з амаль 40 тысячамі пахаванняў. Памерлых хаваюць толькі тут.

— На могілках па вуліцах Антонава і Касманаўтаў, па словах старэйшага майстра, можна назіраць адзінкавыя выпадкі «падхаванняў» да сваякоў. Месцаў там не засталося. Свежыя магілы побач з раднёй з’яўляюцца ўжо і ў «Аульсе». Гэтым могілкам 22 гады. Першапачатковая назва журботнага месца — «Петраполь». Менавіта так называўся хутар, які знаходзіўся тут раней. У 2009 годзе на тэрыторыі могілак перапахавалі парэшткі вязняў лагера для ваеннапалонных, які ў час Вялікай Айчыннай вайны знаходзіўся ў Гродне. На месцы брацкай магілы ўсталявалі гранітны камень з імёнамі загінулых, якія ўдалося ўстанавіць.

У гэтым годзе ў «Аульсе» пачне дзейнічаць новы водаправод. Сёння разглядаецца магчымасць ўстаноўкі яшчэ аднаго туалета.