«Есці хочацца не толькі ў цэнтры». Бістро з хатнімі абедамі адкрылі на ўскрайку Гродна

Апоўдні 20 сакавіка адбылося ўрачыстае адкрыццё бістро «Абед-Буфет». Наведвальнікі імпрэзы маглі самі праверыць, што можна атрымаць на абед за 3,5 рублі і якія дадаткі да яго можна ўзяць бясплатна.

Умяшчальнасць новай установы харчавання — да 80 чалавек. Абацаюць, што бістро будзе працаваць і на абслугоўванне ахвотных паабедаць і для тых, хто б хацеў арганізаваць банкет.

Таксама прапануюць абеды на вынас і дастаўку ежы ў офіс. Праўда, замову на дастаўку прымаюць пры колькасці ад 20 абедаў.

У дзень адкрыцця бістро прапанавалі 2 супы, 8 салатаў ці закусак і 6 гарачых страваў з гарнірамі, а таксама морсы і кампоты. У продажы ёсць пірагі ды іншая свежая выпечка. Адна з фішак установы — бясплатныя запраўкі для салатаў і соўсы для гарачага. Іх можна браць колькі хочаш.

«Канечне, тут прамзона, але таксама ёсць шмат арганізацый, супрацоўнікам каторых трэба нейдзе абедаць, — расказваюць у адделе маркетынгу ТАА „Атлантык“. — З іншага боку, для тых, хто перамяшчаецца па горадзе на аўтамабілі і хоча смачна і нядорага пад’есці гэта таксама добрая прапанова».

Агулам кажуць, што ў новай установе можна будзе атрымаць абслугоўванне і ежу больш высокага ўзроўню па коштах звычайнай сталоўкі.