Валанцёры Чырвонага Крыжа пачалі дзяжурства каля аўтавакзала і гатовыя дапамагчы гродзенцам на дарогах

З 24 студзеня Чырвоны Крыж пачаў дзяжурства каля аўтавакзала. Валанцёры гатовыя аказаць усім жадаючым першую дапамогу, а таксама сагрэць гарачай гарбатай і супамі. Дабрачынная арганізацыя нагадвае гродзенцам і пра свой канал аўтадапамогі ў дадатку «Зелло-рацыя».

«У цэнтры горада ў гэтым годзе мы сталі першы раз, раней стаялі каля школы № 18 у Дзень снегу, — распавядае рэгіянальны каардынатар па першай дапамозе і рэагаванні на надзвычайныя сітуацыі Гродзенскага Чырвонага Крыжа Валерый Краеўскі. — Усім жадаючым даем гарачы чай і супы. Людзі актыўна падыходзяць і гэта неабавязкова маламаёмасныя, былі і тыя, хто доўга стаяў на прыпынку. Паколькі тэмпература была не ніжэй -15 градусаў, палатку, якая ацяпляецца, было вырашана не ставіць».

25 студзеня валанцёры працягнуць стаяць каля аўтавакзалу. Калі тэмпература будзе паніжацца, то дзяжурствы Чырвонага крыжа працягнуцца.

Валанцёры таксама нагадваюць, што ўжо больш за два гады працуе створаны імі ў дадатку «Зелло-рацыя» канал аўтадапамогі. На дадзены момант канал налічвае больш за 500 удзельнікаў.

«У сувязі з кепскімі ўмовамі надвор’я, мы аднаўляем сваю пастаянную прысутнасць на канале і пры магчымасці будзем выязджаць на дапамогу ў межах горада і ў 10 км за яго межамі. Нагадваем, што ў канале „Аўтадапамога Гродна//Чырвоны Крыж“ можна не толькі папрасіць аб дапамозе пры няспраўнасці аўто, але і паўдзельнічаць у яе аказанні», — дадаў Валерый Краеўскі.

Інструкцыя па ўсталёўцы дадатку «Зелло-рацыя»:

1. Заходзім на сайт праграмы zello.com (Play Маркет, Apple Store)
2. Спампоўваем праграму для iPhone, Android, Windows Phone, BlackBerry або ПК
3. Усталёўваем, запускаем. Рэгіструемся (у самой праграме) і запаўняем свой профіль.
4. У кантактах ёсць робат echo — пагаварыце з ім, наладзьце мікрафон.
5. Знаходзім канал «Автопомощь Гродно // Красный Крест» і падключаемся.