Дзе шукаць Дзеда Мароза? Топ-10 рэзідэнцый у рэгіёне

Новы год — для дзяцей час чарадзейства, а для бацькоў - час успомніць дзяцінства. Дзе на Гродзеншчыне шукаць свята і Дзеда Мароза, распавядае Гродзенская праўда.

Аўгустоўскі канал

Галоўны Дзед Мароз па традыцыі паселіцца на Аўгустоўскім канале. Прымаць гасцей ён пачне 21 снежня, а дзень адкрыцця яго штаб-кватэры ў доміку наглядчыка каля шлюза Дамброўка пачнецца з яркага шэсця Дзядоў Марозаў і Снягурак з усяго раёна. Разам з Дзедам Марозам вітаць гасцей у гэтым годзе будзе новы герой — мясцовы захавальнік казак і легенд Аўгустоўскі Цмок.

Госці сядзібы змогуць сфатаграфавацца на троне каля хаткі Дзеда Мароза, загадаць навагодняе жаданне на мастку праз канал і адправіць ліст па спецыяльнай навагодняй пошце. Аніматары прапануюць задобрыць зязюлю, якая жыве ў гадзінніку. Яна сілкуецца выключна добрымі навінамі, і свае «пачастункі» на лістах паперы для яе дзеці пакінуць у спецыяльным птушыным доміку. Чым больш такіх пажаданняў, тым больш шанцаў разлічваць на выдатны настрой не толькі ў дні святаў, але і на ўвесь год наперад.

Сустракаць гасцей на Аўгустоўскім канале будуць па 13 студзеня. Кожныя пятніцу, суботу і нядзелю прадстаўлення пройдуць з 12.00 да 15.00. Па папярэдняй заяўцы арганізаваныя групы прымуць тут і ў будні.

Прывал

На час навагодніх святаў як рэзідэнцыя Дзеда Мароза будзе працаваць і база адпачынку «Прывал» ў Гродзенскім раёне. З 15 снежня на «Прывале» стартуе шоу-праграма «Сусветны Новы год». У адным месцы тут можна будзе ўбачыць, як сустракаюць Новы год у Кітаі, Германіі, Італіі, Японіі і Мексіцы.

Ля галоўнай жа навагодняй елкі «прапішуцца» гаспадары свята — беларускія Дзед Мароз і Снягурка. Госці змогуць самі выбіраць тую ці іншую сюжэтную лінію, пераходзячы ад адной пляцоўкі да іншай, і нават уплываць на тое, што адбываецца. Для іх рыхтуюць пазнавальныя майстар-класы, сюрпрызы, падарункі, пачастункі. Акрамя гэтага, запланавана цыркавая праграма, галоўным нумарам якой стане шоу малпаў.

Каля Свіцязі

Ужо адкрыўся навагодні сезон у эколага-інфармацыйным цэнтры «У гасцях у дванаццаці месяцаў» на навагрудскім беразе возера Свіцязь. У кампаніі добрай казачніцы і дванаццатага месяца Снежня дзеці становяцца ўдзельнікамі дэтэктыўных прыгодаў па выратаванні ўнучкі Дзеда Мароза. Пасля сустрэчы з Бабай Ягой і гульняў з Вадзяніком, госці дапамогуць яшчэ аднаму герою — павуку — разблытаць павуцінне і крок за крокам паспяхова наблізяцца да шчаслівай развязкі дэтэктыўных прыгодаў. Юныя госці сядзібы паўдзельнічаюць майстар-класах ад Навагрудскага раённага цэнтра рамёстваў і пачаставацца гарачай фіта-гарбатай з печывам.

Акунуцца ў казку ў эколага-інфармацыйным цэнтры «У гасцях у дванаццаці месяцаў» прапаноўваюць аж да 13 студзеня. Прадстаўленні праходзяць кожную суботу і нядзелю з 11.00 да 15.00.

Іўеўскі раён

З 15 студзеня прымаць гасцей будуць у Іўеўскім раёне. Сустрэць свята запрашае «Сядзіба Дзеда зімнікі і Бабы завірухі» ў вёсцы Залейкі. Наведвальнікаў чакаюць прыгоды па казачным лесе, поўнага добрых і злых насельнікаў, мноства заданняў, гульняў, забаў і конкурсаў. Падчас прагулкі зазірнуць госці, напрыклад, у домік Чырвонага Капялюшыка і хацінку Бабы Ягі, пройдуць праз вароты Салаўя Разбойніка і справяцца з выпрабаваннямі ад Сарокі-белабокі.

Пасля ўсіх выпрабаванняў хлопцам прапануюць паглядзець спектакль-казку пад адкрытым небам «Прыгоды ў навагоднім лесе». Чакаюць гасцей у «Сядзібе Дзеда Зімніка і Бабы Завірухі» з 15 снежня па 30 снежня і з 2 студзеня па 15 студзеня з 11.00 да 17.00.

Ваўкавыск

У госці да Дзеда Мароза з 20 снежня запрашае і рэзідэнцыя ў Ваўкавыску. З 2010 года на час навагодніх святаў яна адкрываецца на базе раённага цэнтра рамёстваў. Драўляную хату Дзядулі Мароза ўжо сёння ўпрыгожваюць напісаныя рабятамі лісты, рыхтуецца да сустрэчы з гасцямі елка вышынёй каля 50 метраў, якая расце як раз непадалёк. Увазе дзяцей у гэтым годзе — тэатралізаванае прадстаўленне «Як Алёша Паповіч і князь Юрый Новы год ратавалі». Падарожжа ў казку для арганізаваных груп тут даступныя з 20 снежня па 13 студзеня.

Лідскі раён

10 снежня адчыніла свае дзверы для наведвальнікаў рэзідэнцыя Дзеда Мароза ў Лідскім раёне. З гэтага дня на тэрыторыі аздараўленчага лагера «Бярозка» ў вёсцы Белагруда кожны дзень, за выключэннем нядзелі, праходзяць прадстаўленні.

Каб дабрацца да Дзеда Мароза, дзецям прапануюць прайсці захапляльны квэст і сабраць карту шляху з дапамогай падказак капітана Джэка Вераб’я і капітана Моргана. Падчас прадстаўленняў - а іх кожны дзень плануецца адразу некалькі: у 11.00, 12.30 і 14.00 — працуе тут і выстава-продаж сувенірнай прадукцыі.

Зэльвінскі раён

У Зэльвенскім раёне ў адной з сядзібаў гасцей будзе прымаць Лясны Гаспадар, а ў другой з дзецьмі і дарослымі сустрэнецца Дзед Мароз.

Зімовая рэзідэнцыя Ляснога Гаспадара прыме першых гасцей 15 снежня ў дзіцячым аздараўленчым лагеры «Голубая волна». Госці рэзідэнцыі не зусім звыклага для навагодніх святаў героя памераюцца сіламі з касцюмаванымі ляснымі жыхарамі, патрэніруюцца ў трапнасці, закідваючы сняжкамі з паперы казачных персанажаў, ну і, вядома, сустрэнуцца з Дзедам Марозам. Па папярэдніх заяўках арганізаваныя групы тут гатовы прыняць да канца зімовых вакацый школьнікаў.

Зэльва

Ужо ў другі раз расчыніць свае дзверы для наведвальнікаў Палац Дзеда Мароза ў Зэльве. Размесціцца ён у культурна-забаўляльным цэнтры «Феерыя». Сустрэцца з казачнымі персанажамі тут можна будзе з 22 снежня да 5 студзеня. Увазе гасцей — музычна-гульнявыя шоў, майстар-класы па прыгатаванні падарункаў сваімі рукамі, конкурсы і тэматычныя відэапаказы. У Палацы Дзеда Мароза пройдзе конкурс на лепшую навагоднюю праграму сярод усіх устаноў культуры раёна, і ацаніць кемлівасць і знаходлівасць аўтараў свята змогуць у тым ліку і гледачы.

Ашмянскі раён

Адкрыецца для юных гасцей з 15 снежня і рэзідэнцыя Дзеда Мароза на Ашмяншчыне. У аграсядзібе «Вячкойни» хлопцам прапануюць паўдзельнічаць у квэсце «Снежныя гісторыі, або Прыгоды пушысцікаў». Акрамя традыцыйных казачных персанажаў, дапамагаць пераадольваць перашкоды юным гасцям будуць ф’екі - пухнатыя стварэння-сімвалы ўдачы. У праграме таксама пачастункі і падарункі ад Дзядулі Мароза, навагодні аквагрым, майстар-класы па дэкаратыўна-прыкладной творчасці. Будзе працаваць сувенірная крама.

Ужо зараз заяўкі на правядзенне святаў для арганізаваных груп тут прымаюць не толькі ад жыхароў Ашмянскага, але і суседніх Смаргонскага і Астравецкага раёнаў.

Замасцяны

Яшчэ адным адрасам казкі на Ашмяншчыне стане аздараўленчы лагер «Дружба» ў вёсцы Замасцяны. Навагоднія прадстаўленні тут пачнуцца 26 снежня, і, апроч падарожжа з выкананнем заданняў на тэрыторыі лагера, гасцям прапануюць змяніцца з дапамогай аквагрыма і пакаштаваць салодкі пачастунак ад галоўнага зімовага чараўніка. Кульмінацыяй свята па традыцыі будзе карагод ля навагодняй елкі ў клубе аздараўленчага лагера, дзе ў гэтым годзе, дарэчы, прайшоў капітальны рамонт. Стануць удзельнікамі праграмы «А ў нас Новы год! Елка ў госці кліча!» у асноўным навучэнцы школ раёна.