«Металург» перапыніў васьміматчавую бяспройгрышную серыю «Нёмана»

Пасля міжнароднай паўзы аднавіўся чэмпіянат Беларусі па хакеі. У Гродне каманда Сяргея Пушкова 13 лістапада прымала жлобінскі «Металург» і нечакана саступіла з лікам 1:2.

Нягледзячы на ​​тое, што гродзенская каманда паказала актыўную гульню і больш чым у два разы перакiдала свайго суперніка, яна прымудрылася прайграць. Металург ў Гродне перапыніў васьміматчавую бяспройгрышную серыю «Нёмана».

«Нёман» — «Металург» 1:2 (1:1, 0:0, 0:1)

галы:

02:21 1:0 — Крыскін (Казячы, Савінаў)
17:33 1:1 — Абмётка (Нікулін, Кунцэвіч)
46:08 1:2 — Маслюкоў (Марчанка, Ягораў)

Галоўны трэнер «Нёмана» Сяргей Пушкоў пасля прайгранага матчу:
— Ну я хачу сказаць, што першы перыяд — гэта лепшы перыяд быў за той час са жніўня, з таго часу, як мы працуем. Я сказаў пра гэта хлопцам у распранальні. Стварыўшы столькі момантаў, добрых камбінацый, актыўнай гульні … Усё было, але толькі адзін гол.

У другім перыядзе дадалося трохі бязладдзя, хоць тая актыўная гульня, якую мы паказвалі ў першым перыядзе працягвалася, але не прыводзіла да завяршэння. Выдатна згуляў варатар гасцей, ну, а нам не хапіла гульца пад варотамі на дабіванні, калі шайба адскоквае.

Ну і трэці перыяд, нас прымушала сітуацыя атакаваць, але памылка яшчэ адна прывяла да голу у нашы вароты. У жаданні, старанні гульцам не адмовіш, лічу нават пры такой гульні, калега сказаў, што яны не мелі перавагі і рэалізавалі нешматлікія моманты. Ну, а мы з адным голам, пры руху на працягу трох перыядаў, зрабіць каля 60-ці кідкоў з якіх каля 40-ка сышлі ў брамніка, я думаю, што павінны былі знайсці гульца, які мог бы туды іх дабіваць. Але, на жаль, сёння не аказалася такога гульца. У прынцыпе, гульнёй можна застацца задаволеным, вынікам не.