Каля тыдня таму падчас археалагічных раскопак на тэрыторыі Старога замка былі выяўленыя рэшткі трох драўляных пабудоў. Праз некалькі дзён археолагі прыйшлі да меркавання, што знаходкі адносяцца да другой паловы ХIV стагоддзя.
«Мы ведалі, што тут будзе драўляная забудова горада. У знойдзеных пабудовах жылі нашы гродзенцы», — распавяла кіраўнік археалагічных раскопак Наталля Кізюкевіч.
Зараз знаходкі вывучаюцца і замалёўваюцца. У будучыні іх могуць закансерваваць, а пасля экспанаваць у замку. Таксама вядома, што ў гісторыка-археалагічным музеі шукаюць спецыялістаў, якія змогуць зрабіць кансервацыю знаходак.
Рэшткі драўляных пабудоў знаходзілі на тэрыторыі Старога замка і раней: падчас археалагічных раскопак як у 1930-х, так і 1980-х гадах.
