Першае мерапрыемства «Савецкае дзяцінства» ў рамках праграмы «Карыснае лета ў парку» пройдзе 5 жніўня ў 18.00. Наведвальнікі ўбачаць калекцыю дзіцячых педальных машынак савецкага перыяду, якія збірае гродзенец Дзмітрый Назараў. А самыя малодшыя наведвальнікі змогуць паўдзельнічаць у гонцы на такіх машынках.
Акрамя гэтага парк атракцыёнаў абвясціў збор старых фатаграфій і цацак, якія папоўняць рэтра-куток. Усе будучыя экспанаты можна будзе абмяняць на бясплатнае катанне ў парку.
«Мы даведаліся, што ў Гродне ёсць калекцыянер дзіцячых педальных машынак савецкіх часоў. Нам было б цікава акунуцца ў савецкае дзяцінства, таму мы запрасілі Дзмітрыя да нас. Тым больш у парку мы ствараем рэтра-куток і запрашаем гродзенцаў дзяліцца старымі савецкімі фотаздымкамі і цацкамі. За гэта мы даём магчымасць бясплатна пакатацца на атракцыёнах», — распавяла брэнд-менеджар парку атракцыёнаў Яўгенія Гопаненка.
