Гродзенскія «Варвары» выходзяць з адпачынку і прымуць удзел у першым чэмпіянаце Беларусі

Перыяд міжсезоння ў гродзенскіх «Варвараў» завяршаецца. Ужо ў суботу 5 траўня на штучным полі ЦСК «Нёман» матчам гродзенцаў і мінскіх «Ураганаў» стартуе першы ў гісторыі Беларусі чэмпіянат па амерыканскім футболе.

Нягледзячы на праблемы з адсутнасцю некаторых лідэраў, гродзенцам за перыяд міжсезоння ўсё ж такі атрымалася захаваць касцяк каманды. Таму «Варвары» падыходзяць да старту новага чэмпіянату ў баявым настроі і маюць намер узяць прызавое месца.

«5 траўня на ЦСК» Нёман «адбудзецца першая ў гісторыі гульня новага чэмпіёната, — распавядае галоўны трэнер „Варвараў“ Аляксей Серабракоў. — Што тычыцца мэтаў на гэты турнір, то тут вельмі цяжка нешта прагназаваць. За кубак будзе змагацца 4 каманды. З віцебскімі „Рысямі“ мы не гулялі з 2016 года і не зразумела чаго ад іх чакаць. „Літвіны“ пакуль выглядаюць фаварытамі на паперы, але новая каманда з Мінска — „Ураганы“, сабрала ў сваім складзе вельмі дасведчаных і моцных гульцоў з „Зуброў“ і „Літвінаў“, і зразумець што ж яны з сябе ўяўляюць вельмі складана. „Вартавыя“ і „Паганцы“ вырашылі сезон 2018 прапусціць з-за недахопу персаналу. „Зубры“ праглынулі „Ласёў“ і працягваюць удзельнічаць у Кубку Монтэ Кларка. Знаёмых супернікаў па сутнасці не засталося, па гэтаму і цяжка ставіць мэты, але план у нас на турнір, гэта мінімум — бронза».

Ёсць надзея на светлую будучыню

У канцы красавіка аматарская каманда з Гродна атрымала дзяржаўную рэгістрацыю і на дадзены момант у яе ёсць упершыню дамоўленасці аб фінансавай падтрымцы з трыма прыватнымі арганізацыямі: «Модера-Мебель», «Севас», «БоссЛес». Усе гэтыя арганізацыі займаюцца дрэвам і былі знойдзеныя стараннямі аднаго з гульцоў «Варвараў», прызёра Чэмпіянатаў свету і Еўропы па барацьбе Віталем Сіваковым. Дзякуючы першай спонсарскай дапамоге, футбалісты разлічваюць змяніць свой трэніравальны працэс.

«У цэлым зрухі пазітыўныя і гэта радуе, што на нас трохі звярнулі ўвагу. Акрамя гэтага актыўную дапамогу нам аказвае начальнік аддзела спорту і турызму Гродзенскага Гарвыканкама — Яўген Ародзь. Філармонія бясплатна размясціла афішы. Быў эфір на» Радыё Гродна" і ад іх жа будзе рэклама гульні. Сёння ў нас ёсць надзея на светлую будучыню — яшчэ з восені мінулага года каманда пачала супрацоўніцтва з гімназіяй № 2 і на іх базе пачаўся набор у каманду моладзі. Гэтак жа да нас у гэтым сезоне далучаецца каля 10 чалавек з каманды брэсцкія «Вартавыя», якія не змаглі сабраць склад на сезон", — дадаў Серабракоў.

Першы матч сезону ў «Варвараў» пройдзе ў суботу, 5 траўня ў 17:00 на штучным полі ЦСК «Нёман».