Дапамога індывідуальным турыстам: гродзенка прапануе запусціць у Гродне City Tour Bus

У многіх гарадах існуюць спецыяльныя гарадскія аўтобусы з аўдыягідам для турыстаў. Гродзенка Марыя Пятачэнка прапаноўвае для аглядных экскурсій па Гродне запусціць менавіта такі аўтобус. Ён быў бы прыдатны ў кепскае надвор’е або для людзей з рознымі абмежаваннямі.

Марыя запусціла збор подпісаў пад петыцыяй у інтэрнэце. Незалежна ад колькасці сабраных подпісаў, тэкст будзе адпраўлены ў гарвыканкам.

«City Tour Bus дапаможа развіць індывідуальны турызм у Гродне для тых, хто замест аўтобуснага тура вырашыў прыехаць самастойна, — распавядае Марыя. — Такі аўтобус гэта выдатная опцыя пры дрэнным надвор'і, для цяжарных жанчын, сем’яў з маленькімі дзецьмі. Невялікія турыстычныя бусы я бачыла ў Каўнасе, Клайпедзе, яны карыстаюцца папулярнасцю ў турыстаў і надаюць шарм гораду».

Паколькі Гродна — параўнальна невялікі горад, на такім City Tour Bus індывідуальных турыстаў можна звазіць у Каробчыцы, на Аўгустоўскі канал і ў іншыя месцы, куды турыст без уласнага транспарту наўрад ці даедзе, тлумачыць Марыя.

Як гэта працуе ў Мінску

У Беларусі City Tour Bus ёсць толькі ў Мінску. Там такі аўтобус адпраўляецца на экскурсію, калі набралася мінімум чатыры чалавекі. У 2012 годзе турыстычная кампанія «Дром-тур» пры падтрымцы Мінгарвыканкама стварыла экскурсійны маршрут Minsk City Tour. Спачатку быў толькі адзін аўтобус. У сакавіку 2014 года набылі другі. Абодва нямецкай фірмы MAN і абодва грунтоўна адрэстаўраваны, бо кожнаму з іх было больш за 20 гадоў.

Сёння турыстычныя аўтобусы ў Мінску належаць турфірме «Сіці Бас». Аператар турфірмы распавёў Hrodna.life, што такія аўтобусы карыстаюцца папулярнасцю не толькі сярод турыстаў, але і ў гараджан. Адзін аўтобусны тур па сталіцы доўжыцца 1 гадзіну 40 хвілін і каштуе для дарослых 30 рублёў. У дзень Minsk City Tour можа выязджаць на максімум чатыры рэйсы.