Гасцініцу «Беларусь» прадалі за 2 мільёны долараў кампаніі з Баранавічаў

Адзіную заяўку разгледзела конкурсная камісія пры Гродзенскім гарвыканкаме і пасля гадзіннага абмеркавання пагадзілася прадаць гасцініцу і рэстаран, піша «Гродзенская праўда».

Іх новымі ўладальнікамі сталі бізнесмены прыватнай кампаніі з Баранавічаў з чыста беларускім капіталам, якія займаюцца інвеставаннем у розныя аб’екты па ўсёй Беларусі, у тым ліку і гасцінічныя.

[irp posts="40 768″ name="Апошняя спроба. Гасцініцу Беларусь" паспрабуюць прадаць па зніжаным кошце"]

Выбар пакупніка звязаны з турыстычнай прывабнасцю Гродна і яго геаграфічным месцазнаходжаннем. Па словах прадстаўніка фірмы з Баранавічаў, Мінск ужо перапоўнены гасцініцамі, там цесна для новага аб’екта ў адрозненні ад перспектыўнага з пункту гледжання турызму Гродна. Дадатковым стымулам развіцця можа стаць падаўжэнне ўказа пра бязвізавы рэжым і павелічэнне тэрміну знаходжання іншаземцаў да 10 дзён.

Адзіным недахопам у «Беларусі» пакупнік лічыць яе вялікія памеры. Дастаткова удвая меншых плошчаў, так як у Гродне запаўняльнасць гасцініц трымаецца на агульным для краіны ўзроўні - 30−35 працэнтаў.

[irp posts="38 889″ name="Жадаючых не знайшлося. Гасцініцу Беларусь" у Гродне зноў не прадалі"]

На месцы рэстарана магчыма зробяць спа-цэнтр, фітнес-клуб або медыцынскія паслугі.

Па ўмовах конкурса новы ўладальнік абавязаны захаваць гасцінічны профіль на працягу мінімум пяці гадоў, а на працягу трох гадоў інвеставаць адзін мільён долараў на развіццё паслуг гасцініцы і рэстарана, а таксама захаваць не менш за 40 працоўных месцаў.

Гасцініца «Беларусь» была пабудавана ў 1968 годзе і тады лічылася самай буйной у Гродна. У ёй 188 нумароў на 242 месцы. Некалькі гадоў таму правялі мадэрнізацыю на некалькіх паверхах, а вось рэстаран з-за забароны санэпідслужбы адкрыць не ўдалося, бо яго харчаблок трэба цалкам мадэрнізаваць.