«Я закахаўся ў Гродна і ў каманду з першай хвіліны». Дзмітрый Кавалёнак завяршыў кар’еру футбаліста

Пераможны матч «Нёмана» супраць «Шахцёра» стаў апошнім для легенды гродзенскага футбола 40-гадовага Дзмітрыя Кавалёнка. Пасля матчу каманда і заўзятары зладзілі футбалісту годнае развітанне.

«Што значыць канец гульнявой кар’еры, я яшчэ не ўсвядоміў. Мой розум адмаўляецца гэта рабіць, бо з шасці гадоў гуляў у футбол, — распавядае Дзмітрый. — Што будзе далей — пакажа час, але я застаюся працаваць у „Нёмане“ на пасадзе спартыўнага дырэктара. Я не зусім хацеў, каб мяне так праводзілі, бо ў клубе былі і іншыя добрыя футбалісты, з якімі так не развітваліся. Хочацца, каб гэтая традыцыя захавалася ў камандзе і ў будучыні ўсіх так праводзілі.

Я рады, што трапіў у гэты горад і абараняў колеры „Нёмана“, тут я здабыў жыццё, кар’еру, каханне, сям’ю і многае іншае. Я закахаўся ў Гродна і ў каманду з першай хвіліны, калі выйшаў гуляць за „Нёман“. Гродна гэта зусім іншы горад, які адрозніваецца ад усіх іншых у Беларусі, і я рады, што тут апынуўся. На працягу кар’еры ў мяне было шмат добрых момантаў, але думаю, што самым запамінальным будзе завяршэнне кар’еры футбаліста».

Даведка

Дзмітрый Кавалёнак дэбютаваў у складзе гродзенскага клуба больш за 16 гадоў таму, упершыню выйшаўшы на поле ў футболцы «Нёмана» 11 красавіка 2001 года. За гэты час гулец адыграў за жоўта-зялёных чатырнаццаць сезонаў, усталяваўшы два галоўныя камандныя рэкорды ў найноўшай гісторыі клуба: адыграў у чэмпіянаце Беларусі больш за ўсіх матчаў - 292, а таксама забіў у чэмпіянаце больш за ўсіх галоў - 68.

Нападаючы чатыры разы станавіўся лепшым бамбардзірам сезону (2002, 2003, 2008, 2010). Калі лічыць, што пераможны гол гульца прыносіць камандзе 2 ачкі, а апошні гол каманды ў матчы, які дазволіў звесці матч унічыю — прыносіць 1 ачко, то з 68 забітых нападаючым мячоў, вырашальнымі ў матчах сталі 33. Дакладныя ўдары Кавалёнка паклалі ў скарбонку клуба 53 ачкі.