Пасля двух паразаў у чэмпіянаце Беларусі хакеістам “Нёмана” ўдалося перамагчы. У Лідзе 26 кастрычніка мясцовая каманда саступіла гродзенцам з лікам 1:4.
У складзе “Нёмана” шайбы закінулі Канстанцін Багданоўскі, Павел Баярчук, Вячаслаў Лісічкін і Арцём Ляўша. У “Ліды” вызначыўся Андрэй Перагуда.
«Лiда» – «Нёман» – 1:4 (0:2, 1:1, 0:1)
Галоўны трэнер “Нёмана” Сяргей Пушкоў пасля матчу:
“У сённяшнім матчы правялі вельмі добра першы перыяд, у якім забілі дзве вельмі добрыя шайбы. Але гэта адзінае што сёння атрымалася – адзін перыяд адыграць на вельмі добрым тоне, добры хакей быў, добрыя пазіцыйныя атакі. Усё скончылася з надыходам другога перыяду: пайшла гульня на сустрэчных курсах, выдаленнi, якія мы атрымалі, адразу ж перавярнулі гульню ў іншы бок, гульня адразу ж пайшла не па нашым сцэнары.
Лічу, гаспадары стварылі дастаткова момантаў, маглі забіваць галы, і гульня магла скончыцца з іншым лікам. Задаволены, што давялі гульню да перамогі, задаволены вельмі нашымі брамнікамі. Віталь атрымаў траўму, Макс стаў у вароты і працягнуў гульню ў тым жа ключы. Таму заслугоўваюць сёння вельмі добрай ацэнкі, яны вельмі выдатна дапамаглі камандзе”.
Пасля 12 праведзеных гульняў у чэмпіянаце Беларусі “Нёман” размясціўся на 4-м месцы і мае ў сваім актыве 24 ачкі.
У суботу 28 кастрычніка “Нёман” у Гродне будзе прымаць аўтсайдэра чэмпіянату “Брэст”. Варта адзначыць што “паўднёўцы” ў гэтым сезоне ўжо перамагалі каманду Сяргея Пушкова.
