Гродзенец Уладзіслаў Ядэшка стаў чэмпіёнам Еўропы па тайскім боксе

Уладзіслаў Ядэшка — трэнер «Байцоўскага клуба» і выхаванец іншага гродзенскага байца Дзмітрыя Варца — стаў найлепшым на чэмпіянаце Еўропы 14−22 кастрычніка ў Парыжы. У фінале гродзенец перамог байца з Турцыі.

Уладзіслаў выступаў у вагавай катэгорыі 63,5 кг. У першай бойцы гродзенец адолеў спартсмена з Фінляндыі Яна Бьёркскага. У фінале Ядэшка біўся з турэцкім байцом Антэплi Анурам і ўзяў перамогу накаўтам.

«На чэмпіянаце Еўропы згодна з лёсаваннем у мяне былі два баі, у якіх я атрымаў перамогу, хоць у фінальным хацелі засудзіць. Але мне ўдалося даказаць, што я лепшы, і другі раз стаць чэмпіёнам Еўропы. Золата чэмпіянату прысвячаю свайму трэнеру Дзмітрыю Варцу», — распавядае Уладзіслаў.

Сёння 19-гадовы Уладзіслаў Ядэшка з’яўляецца адным з лепшых маладых спартсменаў Беларусі па ўсходніх адзінаборствах. У Еўропе ён ужо быў чэмпіёнам не адзін раз, а вось на чэмпіянаце свету яшчэ не. У 2015 годзе ў Тайландзе гродзенцу ўдалося стаць другім.

«На чэмпіянаце Еўропы ў Францыi я паказаў трэнеру, што нешта ўмею і займаюся патрэбнай справай. Перамогі мне даюць стымул біцца далей. У 2018 хачу ўзяць золата чэмпіянату свету», — дадаў хлопец.

[irp posts="21 938″ name="Гродзенскі баец Дзмітрый Варац стаў чэмпіёнам свету па муай-тай"]

Уладзіслаў Ядэшка не толькі трэніруецца ў Дзмітрыя Варца, але і сам працуе з маладымі спартсменамі. Зараз у чэмпіёна Еўропы ў групе больш за 20 дзяцей і дзяўчат.

Варта адзначыць, што стрыечны дзядуля Уладзіслава — гэта вядомы гродзенскi баскетбаліст і трэнер Іван Ядэшка, які ў 1972 годзе ў складзе зборнай СССР стаў Алімпійскім чэмпіёнам.

Трэнерскі штаб «Байцоўскага клуба» і сам Уладзіслаў Ядэшка дзякуюць фірме Лама Голд за спонсарскую дапамогу і магчымасць выступіць на чэмпіянаце Еўропы.