У Гродне былыя супрацоўнікі «БелДрев» праз суд спрабуюць дамагчыся выплаты заробкаў

Шасцярым гэта ўжо ўдалося, але ў спісе яшчэ не адзін дзясятак прозвішчаў, паведамляе АНТ.

Тры гады таму на прадпрыемстве «Белдрев» былі высокія зарплаты і добрыя ўмовы працы, але высокія працэнты па крэдытах і скарачэнне аб’ёмаў збыту паставілі кропку на добрым іміджы. Заробкі сталі выплачвацца нерэгулярна, працоўны тыдзень скараціўся да чатырох дзён. Супрацоўнікі пачалі масава звальняцца. За 1,5 года штат скараціўся ў шэсць разоў.

youtu.be/0dhETQnplEM

Валерый Абрамчык, жыхар Гродна: «Заробак не выплачваўся ні праз месяц, ні праз два, ні праз тры». Мужчына неаднаразова званіў галоўнаму бухгалтару прадпрыемства, на што атрымаў адказ — грошай няма і калі яны будуць выплачаныя ніхто не ведае.

Не дачакаўшыся выплат, рабочыя звярнуліся ў прафсаюз, а затым і ў суд. У выніку шасцёра спагналі з прадпрыемства больш за 6 тысяч рублёў. Праўда, грошай чакалі больш за два месяцы — рахункі кампаніі былі арыштаваныя.

Вольга Калінка, галоўны прававы інспектар Гродзенскага абкама прафсаюза работнікаў мясцовай прамысловасці: «Гэта найбольш праблемнае прадпрыемства ў нашай галіне. Мы адсочваем. Не хачу сказаць, што кожны дзень, але раз на тыдзень хто-небудзь са спецыялістаў альбо пад’язджае на прадпрыемства, альбо звязваецца са спецыялістамі прадпрыемства, трымае сітуацыю на кантролі».

З некаторымі дагэтуль расплачваюцца, не толькі грашыма — нават канапамі і крэсламі. Абстаноўка на прадпрыемстве па-ранейшаму складаная.

Віктар Лапец, дырэктар: «Тыя, хто звольніўся, вядома, крыўдна, можна сказаць просім прабачэння ў іх, ну, не атрымалася, таму што калі аддаваць усе грошы, якія пералічвалі нам нашы крамы, практычна тады на сыравіну, матэрыялы, а таксама на дарогу і адгрузку прадукцыі было бы нуль».

Сёння на фабрыцы працуюць 150 чалавек — нават ім зарплата за чэрвень выплачана яшчэ не цалкам. Людзям павінны каля 40 тысяч рублёў. У кампаніі абяцаюць вырашыць усе праблемы да канца года.