Электронная петыцыя гродзенца Сяргея наконт будаўніцтва паркоўкі каля паліклінікі №3 восенню 2016 года сабрала ўсяго 5 подпісаў. Але зварот усё роўна трапіў у гарвыканкам і атрымаў станоўчы адказ. Амаль праз год паркоўка з’явілася, а аб праведзенай працы выканаўцы зрабілі падрабязную справаздачу.
“Мы, ніжэйпадпісаныя грамадзяне Беларусі, з-за праблемы з паркоўкай асабістага транспарту для наведвання”Гарадской паліклінікi №3 г.Гродна”, патрабуем абсталяваць паркоўку для наведвальнікаў”, – так пачынаўся зварот.
Гарвыканкам ініцыятыву падтрымаў адразу – у першым лісце. Пасля гэтага гродзенскія чыноўнікі адправілі заяўніку яшчэ 4 лісты (!), у якіх паэтапна давалі справаздачу аб будаўніцтве. Спачатку заяўніку паведамілі, што працы пачатыя, потым – што працы амаль скончаны, засталося толькі ўсталяваць дарожныя знакі і нанесці разметку, а для гэтага трэба дачакацца добрага надвор’я. У трэцім лісце гарвыканкам праінфармаваў, што ўсе працы будуць завершаны ў ліпені. У пачатку жніўня прыйшоў ліст, у якім было напісана, што паркоўка гатовая.
Наведвальнікі і супрацоўнікі паліклінікі на Пестрака радыя, што іх старую паркоўку пашырылі ды дадалі новую. Паркоўкі пастаянна запоўненыя.
На petitions.by пішуць: «Цудоўная ілюстрацыя таго, што дзяржорганы могуць быць рэальна карыснымі, калі там працуюць адказныя людзі. Малайцы гродзенскія чыноўнікі, і самі гродзенцы, якія паведамілі аб праблеме, таксама малайцы. Жальцеся – і вас пачуюць”.
