«У гэтых карт ёсць гісторыя, а зараз і будучыня». У Гродне прэзентавалі адноўленыя карты Лапіных

Яшчэ два гады таму ніхто не мог падумаць, што ў Гродне пачнуць аднаўляць старыя ігральныя карты Лапіных, якiя выпускалiся ў горадзе да Другой сусветнай вайны. Дзякуючы актыўным гродзенцам, перадусім творчаму згуртаванню «А-Чатыры», карты амаль праз стагоддзе вярнуліся ў продаж. Прэзентацыя новых ігральных карт Лапіных прайшла ў суботу 8 ліпеня ў Новым Замку.

Спецыяльна да прэзентацыі гісторык Андрэй Вашкевіч падрыхтаваў выставу з унікальнымі экспанатамі, звязанымі з друкаванай вытворчасцю ў Гродне, а таксама выпускам карт. На прэзентацыі быў паказаны і фільм Наталлi Шматко пра традыцыi друку на Гродзеншчыне і пра тое, як ствараліся новыя ігральныя карты Лапіных. Сюрпрызам стаў выступ ілюзіяніста.

«Сёння першае і самае важнае гэта тое, што гродзенцы змаглi дакрануцца да гісторыi, адчуць рух часу ўласнаруч, — кажа ініцыятар аднаўлення карт Антон Янкоўскi. — Усе, хто наведалi прэзентацыю, не толькі змаглi ўбачыць i набыць карты, якія мы аднавiлі, а таксама маглі паглядзець на арыгіналы карт, якія друкаваліся амаль стагоддзе таму».

Новыя карты, фактычна, ствараліся з нуля. Жонка Антона Наста малявала з арыгіналаў кожную карцінку, а пасля працавала з ёй на камп’ютары.

«Калі мы ўзяліся за аднаўленне карт, стала паступаць усё больш інфармацыі. Быццам карты чакалі моманту, калі за іх возьмуцца. Бо да знаходкі карт пра іх у горадзе амаль нічога не было вядома. Калі мы ўжо распрацавалі ўласную каробку і пусцілі карты на вытворчасць, знайшлася і цэлая арыгінальная калода, якую трымаў сам ўладальнік фабрыкі Аляксандр Лапін. Праект аднаўлення быў цікавы. Можа, у будучыні выпусцім карты і іншага выгляду, бо ў Лапіных іх было некалькі варыянтаў», — дадаў Антон.

Ілюзіяніст Рыгор Нікіфараў, які на прэзентцыi паказваў фокусы з новымi картамі, адзначыў сучасную прадукцыю, як якасны прадукт з незвычайнай энергетыкай.

«На прэзентацыі я патрымаў у руках як старыя карты Лапіных, так і новыя. Адчуваю, што ў гэтых карт ёсць гісторыя, а зараз — і будучыня. Па старых картах магу сказаць, што энергетыка ад іх зыходзіць сур’ёзная, адчуваецца, што яны пабывалі ў розных руках, і добрых, і дрэнных. Прадукт вельмі якасны. Новыя карты не горш за старыя і мне з імі ўдалося ўжо папрацаваць, адчуваецца таксама незвычайная энергетыка».

Яшчэ да прэзентацыі новыя карты Лапіных паступілі ў продаж у краме «Кубік». Першыя некалькі тыдняў калоду новых карт можна будзе набыць усяго за 5 рублёў.