Футбалісты «Нёмана» ў матчы з «Іслаччу» здабылі першую перамогу ў чэмпіянаце

Свой другі матч у чэмпіянаце «Нёман» праводзіў у Мінску 8 красавіка супраць «Іслачы». Каманды паказалі добрую баявую гульню з багаццем небяспечных момантаў, але вызначыцца ў ёй удалося толькі гродзенцам. Адзіны і пераможны гол у матчы забіў Павел Савіцкі.

У матчы з «Іслаччу» гродзенцы, як і ў 1-м туры, добра згулялі ў абароне і не далі суперніку здабыць свае вароты. І наперадзе каманда Ігара Кавалевіча стварыла шмат момантаў, але з рэалізацыяй у чарговы раз узнікаюць праблемы. У першым тайме гродзенцы мелі мноства момантаў для ўзяцця варот суперніка, але ў жоўта-зялёных бракавала дакладнасць.

У другім тайме «Нёман» зменшыў абароты, але здолеў вызначыцца. На 74-й хвіліне Павел Савіцкі з краю штрафной адправіў мяч дакладна пад перакладзіну ў вароты «Іслачы». Праз 7 хвілін супернiк адказаў далёкім ударам — «Нёман» выратавала перакладзiна.

У канцы матчу аўтар галявога мяча Савіцкі мог афармляць і дубль, але ў патрэбны момант капітана «Нёмана» падвяла рэалізацыя. Нягледзячы на гэта, «Нёман» здолеў абыграць «Іслач» і зарабіў свае першыя 3 ачкі.

Галоўны трэнер гродзенцаў Ігар Кавалевіч пасля перамогі над супернікам адзначыў, што 3 ачкі яго камандзе далiся няпроста.

«Цяжкая перамога, зыходзячы з гульні ў другім тайме. Але чым цяжэй, тым каштоўней. Добра, што згулялі на нуль ззаду. Праўда, хацелася б таксама рэалізаваць моманты, якія мы стварылі, асабліва ў першым тайме. На жаль, трохі збіўся прыцэл у Лакцiёнава.

Нам супрацьстаяла каманда, якой я вельмі сімпатызую. Гэта вельмі мужная і дастойная каманда, падобная да свайго трэнера. Так што ў нас быў няпросты супернік, які, думаю, будзе змагацца ў чэмпіянаце да канца. Жадаю „Іслачы“ выбрацца з той няпростай сітуацыі, у якую яна патрапіла».

Пасля перамогі над «Іслаччу» гродзенцы ўзначалілі турнірную табліцу і маюць у сваім актыве 4 ачкі. У нядзелю 9 красавіка пройдуць іншыя матчы чэмпіянату і, магчыма, становішча каманд у табліцы памяняецца.

А чарговы матч «Нёман» правядзе ўжо ў Гродне 15 красавіка, дзе будзе прымаць ФК «Слуцк».