Справу Наталлі Канюк працягнуць: у батанічным садзе высадзяць яшчэ 7 раслін

Адраджэнне батанічнага сада ў Гродне працягнецца — гэтае пытанне ўздымалі ў канцы красавіка ў Гродзенскім гарвыканкаме на ўзроўні старшыні. Працягнуць справу вядомай краязнаўцы, якая памерла ў студзені 2017 года, вырашылі актыўныя гараджане і шэраг арганізацый горада, у тым ліку сярэдняя школа № 8, якая будзе адказнай за гэты сад.

Зелянбуд пачне новыя пасадкі ў парку Жылібера ў пятніцу 7 красавіка ў 11.00. Новыя расліны не будуць выпадковымі - яны былі ў спісе Наталлі Канюк, а таксама ў гербарыi Жылібера, які закладаў батанічны сад у Гродне ў XVIII ст. Агулам высадзяць сем раслін: дрэвападобны півон, дзве скумпii, рабiнiя, карагана дрэвападобная, лапчатка, а таксама японскi cпірэй.

Зелянбуд зацікаўлены ў батанічным садзе і плануе высаджваць расліны не толькі ў гэтай адной частцы парку, але і па ўсёй яго тэрыторыі.

Прадстаўнікі школы № 8 у будучыні будуць сачыць за батанічным садам, бо знаходзiцца ўстанова побач з паркам. Таксама для школы гэта яшчэ і абавязак перад Наталляй Канюк, якая дапамагла ў свой час ствараць там музей сяброўства народаў.

У будучыні плануецца і восеньская пасадка, ёсць верагоднасць, што Зелянбуд пачне высаджваць таксама дрэвы.

Наталля Канюк больш за пяць гадоў займалася адраджэннем батанічнага саду, які калісьці стварыў Жан Эмануэль Жылібер. За гэтыя гады ў парку з’явілася больш за 70 новых відаў раслін. Збіраць калекцыю Наталлі Рыгораўне дапамагалі спецыялісты з розных гарадоў і краін. У пустым будынку былой медыцынскай акадэміі Жылібера яна марыла адкрыць краму-зялярню, аранжарэю, лабараторыю і музей мецэната. Побач з будынкам хацела пасадзіць аптэкарскі агарод, якім зоймуцца студэнты і выкладчыкі ўніверсітэта. Акрамя таго, Наталля Рыгораўна намалявала эскіз помніка Жылібера, які мог бы ўпрыгожыць панадворак.