Настольная эка-гульня «На Трох Кітах» ад аўтараў «Паўстанцаў» і «Мовы» выйдзе ў Дзень роднай мовы

Раней людзі былі ўпэўненыя, што Зямля — плоская, і трымаецца яна на чарапасе, чарапаха стаіць на сланах, а сланы — на трох вялізных кітах. Нават сёння «тры кіты» разумеюцца як аснова чагосьці, база з’яў і рэчаў. Акрамя таго, «На Трох Кітах» — гэта назва новай настольнай эка-гульні ад творчага згуртавання «А-чатыры», аўтараў гульняў «Паўстанцы» і «Мова». Выпуск новай гульні прымеркаваны да Дня роднай мовы.

Настольная гульня для ўсёй сям'і

«Мы самі вырашаем, з чаго ствараецца ўласны Сусвет: з шара альбо плоскага дыска, з сілы прыцяжэння альбо чарапах ды кітоў. Сёння вам давядзецца будаваць свой Сусвет з драўляных дэталяў. Але, адважныя Стваральнікі Сусвету, будзьце ўважлівы: ад стварэння за руйнавання — адзін неасцярожны крок», - гаворыцца ў апісанні гульні.

У настольнай гульні «На трох кітах» гульцам прапанавана пабудаваць і ўтрымаць свой асабісты «сусвет» на аснове трох складнікаў - драўляных слупоў, дыскаў і шайбаў, парадак размяшчэння каторых вызначыць лёс — шасцігранны кубік. Новая гульня будзе зроблена з дрэва без выкарыстання фарбаў і іншых хімічных матэрыялаў, што дае магчымасць без шкоды гуляць у яе як даролым, так і нават самым маленькім беларусам. За сталом можна сабраць да шасці чалавек, а правілы настолькі прастыя, што засвойваюцца хутчэй чым за хвіліну.

Гульня — лепшы падарунак да Дня роднай мовы

«Наша месца на трох кітах!» — радок са знакамітай песні Лявона Вольскага «Тры Чарапахі», што ўжо па праве лічыцца нефармальным гімнам Беларусі. Менавіта з гэтымі словамі распрацоўшчыкі гульні прапануюць сустрэць Дзень роднай мовы. Адмыслова да свята і выхада гульні яны распрацавалі шэраг сувенірнай прадукцыі з рамантычным лозунгам.

Гульня ўжо здадзена ў друк і 21 лютага з’явіцца на паліцах крамаў. Яшчэ ёсць магчымасць далучыцца да кампаніі і атрымаць гульню па спецыяльным кошце. Кожны можа паўдзельнічаць у зборы сродкаў на выхад гульні «На трох кітах». Акрамя самой настолкі ёсць магчымасць атрымаць цікавыя сувеніры да свята, пачынаючы ад паштоўкі, заканчваючы прыгожым драўляным гадзіннікам.