Выкіды ў атмасферу ў Гродзенскай вобласці ў 2016 годзе скараціліся

Выкіды ў атмасферу ў Гродзенскай вобласці ў 2016 годзе скараціліся, паведаміў 25 студзеня на калегіі абласнога камітэта прыродных рэсурсаў і аховы навакольнага асяроддзя яго старшыня Васіль Шлык, перадае карэспандэнт БЕЛТА.

«Паводле папярэдняй інфармацыі, за кошт правядзення мадэрнізацыі на прадпрыемствах вобласці выкіды забруджвальных рэчываў у атмасфернае паветра ад стацыянарных і мабільных крыніц за год знізіліся на 340 т. Праекты па мадэрнізацыі абсталявання, рамонце праведзены ААТ „Газпрам трансгаз Беларусь“ на газаразмеркавальнай станцыі г. Навагрудак, на „Смаргонскім ліцейна
механічным заводзе“. У лакаматыўным дэпо г. Ліда ўвялі ў эксплуатацыю ўстаноўку ачысткі адпрацаваўшых газаў станцыі выпрабавання дызеляў. На ГП „Конус“ адрамантаваная печ гарачага ацынкавання з памяншэннем цеплавой нагрузкі на ванну, у выніку чаго выкіды за год знізіліся на 14,6 т, ААТ „Лакафарба“ мадэрнізавала сістэмы вентыляцыі, гэта зменшыць выкіды ў год да 90 т», — паведаміў Васіль Шлык.

Ён адзначыў, што кожны год у вобласці праводзяць конкурс на лепшую аўтатранспартную арганізацыю, ацэньваючы зніжэнне выкідаў адпрацаваных газаў. У 2016 годзе найлепшыя вынікі паказалі РУП «Беларуснафта-Гроднааблнафтапрадукт», Аўтамабільны парк № 17 г. Смаргонь, ААТ «Гроднааблаўтатранс», аўтапаркі ААТ «Гродзенскі мясакамбінат» і ААТ «Малочны свет».

У той жа час у 2016 годзе лабараторыі Рэспубліканскага цэнтра аналітычнага кантролю зафіксавалі 28 выпадкаў перавышэнняў нарматываў пры працы стацыянарных крыніц.

Перавышэнні нормаў і невыкананне патрабаванняў дзяржстандартаў на таксічнасць і дымнасць адпрацаваных газаў выяўлена ў васьмі прадпрыемстваў на 18 мабільных крыніцах. Па гэтых фактах службовыя асобы і прадпрыемствы прыцягнуты да адміністрацыйнай адказнасці, вынесена адно папярэджанне.

Згодна з дзяржпраграмай «Ахова навакольнага асяроддзя і ўстойлівае выкарыстанне прыродных рэсурсаў» на 2016−2020 гады, да 2020 года выкіды забруджвальных рэчываў у атмасферу павінны знізіцца на 2,7% да ўзроўню 2015-го.