Вядомая знаўца гісторыі Гродна Наталля Канюк памерла ў аўторак, 10 студзеня. Ёй было 68 гадоў. Пра гэта паведаміў у фэйсбуку гісторык Андрэй Вашкевіч.
“Чалавек энцыклапедычных ведаў пра Гродна, збіральніца, даследчык педагагічнай справы”, – напісаў пра яе Андрэй.
“Яе тэксты пра Гародню былі найлепшымі з літаратурнага боку: цікавыя, захапляльныя і павучальныя”, – дадаў у каментарыях гісторык Андрэй Чарнякевіч.
Наталля Канюк з 2011 года адраджала батанічны сад Жылібера, хвалявалася пра лёс былой Медычнай акадэміі і прапанавала размясціць там музей горада і аранжарэю.
Развітацца з Наталляй Канюк можна будзе ў чацвер, 12 студзеня, у 11.00-12.00 на могілках на праспекце Касманаўтаў. У 12.30 – памінальная служба ў Свята-Пакроўскім саборы (вул. Ажэшкі). Пахаванне на могілках на праспекце Касманаўтаў.
