ГрДУ афіцыйна стаў часткай сеткі Erasmus Student Network. Што гэта значыць?

Клуб Міжнародных студэнцкіх ініцыятыў Гродзенскага ўніверсітэта імя Янкі Купалы SUNet (Student University Network) афіцыйна стаў часткай Міжнароднай сеткі студэнтаў па праграме абменаў Erasmus (Erasmus Student Network). Два гады працы студэнтаў-валанцёраў прынеслі вынік: Беларусь стала 40-й краінай-удзельніцай, а ГрДУ 525 секцыяй ESN.

Што такое ESN?

Міжнародная сетка студэнтаў па абмене ў рамках праграмы Erasmus (International Exchange Erasmus Student Network) з’яўляецца найбуйнейшай некамерцыйнай асацыяцыяй студэнтаў у Еўропе. ESN была створана 16 кастрычніка 1989 года для падтрымкі і развіцця студэнцкіх абменаў, афіцыйна зарэгістраваная ў 1990 годзе. У ESN уваходзіць 525 лакальных секцый у 40 краінах Еўропы, якія штогод аказваюць падтрымку амаль 200 тысячам студэнтаў.

Місія ESN — культурны абмен і прадстаўленне інтарэсаў замежных студэнтаў і студэнтаў, якія ўдзельнічаюць у праграмах акадэмічнага абмену, распаўсюджванне магчымасцяў для міжкультурнага ўзаемаразумення і самаразвіцця па прынцыпе «студэнт дапамагае студэнту». Акрамя гэтага, ESN з’яўляецца важным інстытутам у сферы адукацыі ў Еўропе, чые намаганні даўно прызнаны і падтрымліваюцца як на нацыянальных, так і на агульнаеўрапейскім узроўнях.

Што дае ўдзел у ESN?

Сяброўства ў ESN дае шэраг пераваг. У першую чаргу ўдзел у дадзенай арганізацыі павышае прывабнасць і імідж ВНУ ў вачах замежных навучэнцаў і ВНУ-партнёраў, адкрывае доступ да вопыту, напрацаванаму арганізацыяй за 26 гадоў існавання.

Для студэнтаў адкрываецца магчымасць прымаць удзел у міжнародных студэнцкіх канферэнцыях і семінарах, практыкаваць замежныя мовы, усталёўваць новыя асабістыя і прафесійныя кантакты ва ўсім свеце, пастаянна ўдасканальвацца ў розных галінах навукі. З’яўляюцца новыя спосабы матывацыі валанцёраў - перспектывы кар’ернага росту ўнутры ESN, якія каціруюцца як радок у рэзюмэ ва ўсіх еўрапейскіх універсітэтах і ў многіх буйных кампаніях. Акрамя таго, ESN спрыяе інтэрнацыяналізацыі студэнтаў, якія раней не ўдзельнічалі ў праграмах акадэмічнай мабільнасці.